LA UNION – Maysa a mannalon ti kumidkiddaw iti tulong gapu iti mamindua a daras a panangdadael kadagiti mula na a pagay iti saan pay a nabigbig a suspek.
Segun kenni Pepito Rillera, mannalon manipud Gusing Sur, Naguilian, La Union, naduktalan lattan iti kaarruba na a napan laeng nagdalus iti taltalon, a napaspas ken naparoten dagiti mula na a pagay.
Saanen a baro daitoy a pasamak kenni Pepito – nu sadino naminduan a riniribuk iti suspek – ti umuna ket idi maysa bulan paylaeng dagiti pagay na, ken maikadua tatta a maysa kagudwa bulan laeng kuman ket mabalinen daitoy a maapit.
Awan met iti nakarinniri na, ngem suspetsa na iti katinnulag na kuma nga mang-abono kadagiti pagay a saan met a nagparang isu a nagbirok isuna iti sabali.
Gapo iti daitoy ket atapen ni Pepito a mabalin a sakit ti nakem ti motibo iti nangdadael iti sumurok-kumurang 400sqm a kalawa a talon na.
Iti agdama ket awan pay iti aksyon ti barangay-da ken nakadanon metten iti problema na iti Department of Agriculture para iti naan-anay nga aksyon.
Innayon na pay a dakkelen iti gastos na iti panagtalon, nu sadino nalugi isunan iti mapatta-patta a walo nga sako ti bigas.
Kiddaw ni Pepito kadagiti adda ammo na iti napasamak nga iwaragawagen iti kinapudno.
Kinunana nga isardeng nan iti agmula agsipud ta saanen a kabaelan iti bagi na; plano na metten nga ipatalon lattan ti sabali a tao ti daga na.
