BR LA UNION – Agtultuloy ti panangsapol dagiti otoridad iti dua a lallaki a nang-abandonar iti maysa nga asul a mitsubishi delica, a nakadiskubrian da iti 73 a package wenno nabalkot a drug marijuana leaves with fruiting tops, agdagsen ti 73 a kilogramo ken agbalor ti P8, 760, 000 milyon a pisos.
Dagiti dua a suspek ket maibilang a high value individuals iti illegal drug trade, nabigbig iti nagan a Felmen Day-os Aliles ken Amado Paycao AKA “Amado A Gante Jr”.
Iti pannakiuman ti Bombo Radyo La Union kenni Police Major Lawrence Ganuelas, Provincial Community Affairs and Development Unit (PCADU) chief ti La Union Police Provincial Office (LUPPO), kinuna na a nalapdan da iti pannakaiwaras ti nasao a droga, a posible a maiturong koma idiay Metro Manila ken dadduma pay a lugar ditoy Northern Luzon.
Kinuna ni Major Ganuelas, iti pannadiskubre dagiti ilegal a droga ket dackel nga accomplishment ti La Union Police ken resulta ti pannaki-koordinar kadakuada dagiti umili, babaen ti programa ti La Union Police Provincial Office nga idaulwan ni PCol. Heryl Bruno, nga Isumbong Mo Kay Daguit.
Mainaig ti daytoy, imbaga ni Major Ganuelas, a kit-kitaen da iti posibilidad nga adda pakainaigan kadagiti immuna nga operasyon ti pulisiya idiay Barangay New Poblacion, Burgos, La Union a naka-kemmegen iti lima (5) nga high value drug pushers ken pannaka-kumpiskar kadakuada iti P2, 280, 000 a balor ti suspected marijuana leaves.
Malaksid dayta, kit-kitaen da pay ti posibilidad nu am-ammo dagiti drug suspects iti dua pay a babbaro a naarestar idiay ili ti Bacnotan gapu met laeng ti illegal a droga itay nabiit.
Segun kenni Major Ganuelas, nakasaganan dagiti kaso a maidatag kontra kadagiti suspek ken siniguro na a non-bailable iti kaso a sangwen iti dua a high value individuals idiay Santol, La Union.
