BR LA UNION – Agarop alas 8:28 idi rabii (July 9), nailista ti PHIVOLCS ti magnitude 1.9 panagdayyeg idiay Pugo, La Union iti kauneg a 29 kilometro.
Kabayatanna, nailista pay ti nagsaruno a magnitude 3.4 ken 3.6 a panagdayyeg idiay Bolinao, Pangasinan agarop alas 10:25 ken alas 10:55 ti rabii, July 9.
Simmaruno ti magnitude 2.5 a gingined iti oras alas 11:48 ti rabii idiay Agno, Pangasinan.
Nupay kasta, awan ti namnamaen a perdisyon kadagiti nasao a nagsasaruno a nakapsot a panagdayyeg, nga agpapada a tectonic quake.
Immuna a nailista ti magnitude 4.5 a panagdayyeg idiay Pugo, La Union, agarop alas 2:33 ti malem (July 9) ken narikna ti panagdayyeg kadagiti kabangibang nga ili ditoy probinsiya agraman ditoy siyudad ti San Fernando ken idiay Pangasinan.
Ngem segun iti Philippine Institute of Volcanology and Seismology (PHIVOLCS), awan ti namnamaen nga aftershocks iti nasao a panagdayyeg.
Narikna iti napigsa a gingined wenno Intensity V idiay Baguio City ken Intensity IV idiay Aringay, La Union.
