Pinabasol ti Department of Public Works and Highways (DPWH) iti barado a karayan ken tapyas iti pondo para iti flood control projects, dagiti napadasan a panaglayos kadagiti naduma-duma a paset ti pagilian iti kangitingitan dagiti dimuprak a kalamidad.
Intudo ni DPWH Sec. Manuel Bonoan dagiti riverbeds nga ababaw ken addaan iti kapada a lebel kadagiti riverbanks a mangigubway dagiti panaglayos kadagiti kabangibang ken nababa a lugar no maaddaan ti napigsa a panagtudo.
Segun kenkuana, awan ti nangammo kadagitoy a problema.
Ipamaysa ti ahensiya iti desilting wenno panangikkat kadagiti nakabara tapno agbalin a naannayas iti agos ti danom kadagiti karayan kas maysa a sungbat iti panaglayos.
Malaksid iti barado a karayan ket pinabasol pay ni Secretary Bonoan kas rason ti agdama nga estado ti flood control system ti pagilian iti natapyasan a pondo para iti panagsagana ti DPWH iti naurnos nga engineered flood control projects.
Siguden a makiskissayan wenno maik-ikkat iti pondo para iti preparasyon ken engineering wenno panagdesinyo kasta met iti panangipatungpal ti structural ken non-structural solution tapno mapababa iti epekto ti panaglayos.
Nupay kasta ket inaramid ti ahensiya iti kabaelanna tapno maipatungpal iti proyekto.
Kabayatanna, inaklon ti sekretaryo a kasapulan da a sungbatan dagiti nainayon ken urgent flood control projects kalpasan nga agbalin a linteg iti national budget wenno General Appropriations Act (GAA) agsipudta saan a naamiris a nasayaat.
Maipalagip nga iti sidong ti P6.326 trillion national budget para ita a tawen 2025 ket nailatang iti P1.007 trillion, ngem vineto ni Presidente Ferdinand Marcos Jr. iti P26.065 billion a gatad dagiti public works projects para iti panangpababa ken panangkontrol ti layos.
Pakairaman iti P4.58 billion a pondo para iti plano a panangipasdek ken panangmantinir ti flood mitigation structures ken drainage systems; pondo para iti flood mitigation facilities kadagiti kangrunaan a river basins ken karayan; construction ken rehabilitation ti supply ti danom ken sewerage; ken panangkolekta ti rain-water.
Kamauddiananna, nagkari met ni Secretary Bonoan a sumurot iti DPWH iti pammilin ni Presidente Marcos partikular iti panang-imbentaryo dagiti amin a flood control projects iti sidong ti panangidaulona.#
