Nangipaulog ti National Police Commission (Napolcom) ti summons kadagiti pulis a karaman iti kaso dagiti “missing sabungeros” tapno maipaayan dagitoy ti gundaway a depensaan ti bagbagi da.
Opisyal a nangipila ti complaint affidavit na idi aldaw ti Lunes ti whistleblower a ni Julie Patidongan alias Totoy ken ninaganan na amin dagiti nasao a pulis.
Segun kenni Napolcom vice chairperson ken executive officer Atty. Rafael Vicente Calinisan, kasapulan da pay a maawat ti sungbat manipud kadagiti respondent ti kaso isu a mapatulodan dagitoy ti orders wenno summons.
Inlawlawag ni Atty. Calinisan nga adda ti pakabuklan a 18 nga pulis ti dinakamat ni Patidongan iti affidavit na ken 13 kadagitoy ket aktibo paylaeng iti serbisyo bayat a dagit lima ket na-dismiss gapo iti bukod da met a kaso.
Iti panagsango ni Patidongan iti media idi kalman ket imbutaktak na pay a dagiti pulis a karaman iti kaso dagiti “missing sabungeros” ket isu metlaeng dagiti pulis a taga-patay ti durugista idi war on drugs ti napalabas nga administrasyon.
Impaganetget ti hepe ti Napolcom nga ipasidong da pay ti nainget a beripikasyon dagiti rebelasyon ni Patidongan iti complaint-affidavit na karaman ti affidavit dagiti kakabagian ti biktima.
