LA UNION – Nakatuding a ma-repatriate ti nasurok 1,000 Pilipino idiay Lebanon wenno mapa-awid ditoy Pilipinas gaputi kumar-karu a tensiyon iti baetan ti militante nga Hezbollah ken Israel a nakatayanen ti dandani 500 a tattao ken nakasugatan ti nasurok 1,600 nga indibidwal.
Segun kenni Department of Foreign Affairs (DFA) ASec. Robert Ferrer, as-asikaswen ti Embahada ti Pilipinas idiay Beirut ti repatriation dagiti Pilipino a nakasagana nga agawid ditoy pagilian.
Segun iti embahada ti Pilipinas, idi Setyembre 17 ken 18 ket nakapadas iti Lebanon ti saan a ninamnama a panagbettak dagiti beeper a nagresulta iti pannakatay ken pannaka-sugat dagiti rinibu a tattao.
Napasamak iti serye ti panagbettak idiay southern suburbs ti Beirut, South Lebanon ken Bekaa Valley.
Daytoy ket kalpasan a bimmales ti Israel iti Hezbollah fighters a maki-simpatiya kadagiti umili a Palestino a maip-ipit iti rinnupak idiay Gaza.
Kabayatanna, nupay dandani amin a Pilipino idiay Lebanon ket kontra iti mandatory a repatriation ti gobyerno, inallokoy ti DFA official dagiti Pilipino sadiay Lebanon nga ikonsidera iti desisyon bayat a nakalukat pay ti airport ken adda pay dagiti commercial flights.
Siniguro ti opisyal a sungbatan ti gobyerno ti Pilipinas iti magastos para iti immigration ken exit process dagiti dokumentado ken saan a dokumentado a Pilipino idiay Lebanon.
