Nasurok 100 a pidaso ti anchor bars agraman anchor nails iti maipagarop a naipuslit manipud iti maysa a project site idiay Barangay Poblacion, Aringay, La Union.
Maibasar iti police report ti Aringay Police Station, maysa a concerned citizen iti nangi-report iti Aringay Police maipapan iti maipagarop a panangala kadagiti nasao nga scrap materials.
Iti panagresponde dagiti otoridad, nasabat da iti maysa nga asul a kurong-kurong, a mapapati a nakailuganan iti aganay 15 scrap nga anchor bars ken anchor nails. Nabigbig ti suspek iti nagan a Jimboy Ferrer, residente ti nasao a lugar.
Segun kenni Police Staff Sergeant Rimando Pacsi, duty investigator, boluntaryo met a simmuko iti dua pay a mapapati a suspek, nga isuda Sherwin Nimoan Cacanta, 26-anyos, baro, ken Christian Alba, 23-anyos.
Kagiddan daytoy iti pannaka-rekobre iti 100 pay a pidaso ti landok wenno anchor bars a naikali asideg iti karayan wenno 150 metro ti kaadayu na manipud iti construction site.
Segun kenni Pacsi, kas maibasar iti statement ti project engineer, tunggal landok nga agatiddag ti dua a metro ket mapatta-patta nga agbalor ti P3,000.
Nupay kasta, saanen a makaswan dagitoy, kas imbaga ti project engineer agsipudta iti napateg iti kompanya da ket naisubli dagiti nasao a materyales.
