BR LA UNION – Adun ti maipagarop a naibalud ken nakaswan sipud idi naibutaktak iti nalawa a korapsyon iti flood control ken dadduma pay a public infrastructure project iti intero a pagilian.
Segun kenni Department of Public Works and Highways (DPWH) Sec. Vince Dizon, maawatan ti administrasyon iti pungtot ken rurod ti publiko kadagiti naibutaktak a nalawa a korapsyon ngem kasapolan kunana nga agbalin a naannad ti gobyerno iti panangidatag ti kaso kontra kadagiti mairam-raman.
Kinapudno na kunana, umaboten ti nasurok 30 nga indibidwal iti naibalud ken nakaswan sipud idi 2025 State of the Nation Address (SONA) ni Presidente Ferdinand Marcos Jr. a senyales ti panagrugi dagiti serye ti imbestigasyon.
Dagitoy segun kenni Sec. Dizon ket saan a simple a personalidad ngem ketdi mammanday linteg, DPWH officials, District engineers, contractors, ken uray iti sigud a sekretaryo a dinutukan ni Presidente Ferdinand Marcos Jr. a ni Manny Bonoan.
Kinuna na a saan a nalaka iti panangisayangkat ti case build-up ken serye ti imbestigasyon, isunga kayat a masiguro ti administrasyon a saan a basta maibasura dagiti naidatag a kaso kontra kadagiti karaman iti korapsyon.
Tinakderan ni Dizon a saan a ‘babassit a sida’ dagiti naibalud gapu iti naibutaktak nga iskandalo kas iti agassawa a Curlee ken Sara Discaya, Sen. Jinggoy Estrada, ken sigud a Sen. Ramon Revilla, iti laksid ti panangdillaw dagiti kritiko ti agdama nga administrasyon.
Segun kenni Dizon, agtaltalinaed iti pokus ti DPWH a panangamiris ti amin a proyekto a mabalbalkot ti korapsyon ken saan a malipatan uray aglabas ti panawen.
Nagkari iti sekretaryo nga ad-adu pay nga indibidwal ti mabalud ken makaswan gaputi korapsyon, bayat nga agtultuloy iti case build-up ken referral idiay Office of the Ombudsman.
