Dumanonen ti aganay 523,686 a tattao wenno 151,012 a pamilya ti naapektaran ti kallabes a Severe Tropical Storm Crising ken ti agraraira nga Habagat, segun iti situational report ti Department of Social Welfare and Development (DSWD).
Dagiti apektado ket manipud kadagiti 1,134 a barangay idiay National Capital Region (NCR), Ilocos Region, Cagayan Valley, Central Luzon, Calabarzon, Mimaropa, Bicol Region, Western Visayas, Central Visayas, Eastern Visayas, Zamboanga Peninsula, Northern Mindanao, Davao Region, Soccsksargen, Caraga, ken Cordillera Administrative Region (CAR).
Para ti pakabuklan, 33,608 nga indibidwal wenno pakaibatugan ti 9,621 a pamilya ti agdama nga adda kadagiti evacuation centers bayat a 99,834 a tattao met wenno 22,511 a pamilya ti nakaawat ti tulong manipud DSWD uray nu agnanaed da kadagiti evacuation sites.
Aganay P37M a gatad ti tulong itan kadagiti apektado a komunidad ti naiwaras ti gobierno.
Nupay nakaruaren iti Philippine Area of Responsibility (PAR) ti Bagyong Crising idi Sabado ti malem, agtultuloy met iti panangpatudo ti Habagat iti sapasap a pagilian.
