BR LA UNION – Mapatta-patta nga umabot iti 68.43 milyon a Pilipino ti agbotos inton bigat, Lunes, tapno agpili kadagiti baro a national ken local leaders, segun iti Commission on Elections (Comelec).
Maibasar iti listaan, umabot iti 4.3 milyon a Pilipino ti damo nga agbotos para iti national election ita a tawen.
Pinalagipan ti Comelec dagiti botante nga agaramid ti kodigo dagiti kandidato nga ibotos.
Para iti national position, mabalin nga ibotos iti kumpleto a 12 senador wenno nababbaba ngem saan a mabalin a nalab-labes ngem 12, maysa a party-list idinto nga iti local position, dagiti ibotos ket pakaibilangan ti maysa a representative wenno kongresista para idiay kamara, maysa a gobernador, maysa a bise-gobernador, 5 a miyembro ti provincial board,maysa a mayor, maysa a vice-mayor, ken konsehal (depende iti siyudad wenno ili).
Sakbay ti eleksiyon inton bigat, nasken a naiyawat kadagiti botante iti Voter’s Information Sheet (VIS) a naglaun ti napapateg a detalye kas ti presinto, voting center, ken sample ballot. Mabalin met ti agusar ti Comelec Precinct Finder online tapno sapolen iti eksakto a lugar ti binnotosan.
Oras ti panagbotos :
5:00 AM – Senior citizens, PWDs, masikog ken assistant
7:00 AM agingga 7:00 AM – Regular a botante
Walo nga addang iti panagbotos:
Agpa-am-ammo iti electoral board.
I-check ti nagan iti listaan ken iti ramay nu adda tinta na.
Agpirma iti Election Day Computerized Voters’ List.
Awaten iti balota ken marker.
Agbotos babaen iti panang-shade ti timbukel nga adda iti abay it nagan ti kandidato.
Iserrek ti balota iti vote-counting machine ken urayen ti resibo.
Kitaen a naimbag ti resibo ken itinnag iti ballot box a masansan a color yellow.
Mapatedtedan ti indelible ink iti maysa a ramay sakbay a pumanaw iti presinto.
