Dumanon ti nasurok 900,000 a Pilipino iti nagbenipisyar iti medical assistance iti sidong ti Assistance to Individuals in Crisis Situation (AICS) program ti DSWD.
Daytoy a datos ket iti las-ud ti innem a bulan ti agdama a tawen.
Maibasar iti record ti Group Crisis Intervention Unit ti ahensya, dumanon ti pakabuklan a 953,560 individuals wenno katukad ti nasurok P8.5 billion medical aid iti naipaay.
Manipud iti nasao a bilang ket dumamon iti 670,825 clients dagiti nakaawat ti cash assistance a tig-P10,000 bayat nga agarop 282,735 dagiti naisyuan ti guarantee letters tapno maaramat iti hospitalization costs, medication, ken diagnostic procedures.
Segun kenni DSWD Asec. Irene Dumlao, iti kellaat a panagsakit wenno medical emergency ket mabalin a mangitonda ti nakarkaro pay a panagrigat dagiti umili.
Maipalagip nga immunan a naaddaan ti isyu iti panangipaay ti Assistance to Individuals in Crisis Situation (AICS) program idi napalabas nga eleksion gapo iti akusasyon nga ar-aramaten daytoy dagiti pulitiko iti panagkampanyada, banag a pinaglibakan ti ahensya.#
