BR LA UNION – Mapatta-patta nga umabot ti P560,000 ti danyos iti napasamak nga uram iti maysa a frozen food shop iti kawatiwatan ti Quezon Ave. Barangay 2, City of San Fernando, La Union idi parbangon kalman (Agosto 14), maibasar iti inisyal a report ti Bureau of Fire Protection.
Iti pannakiuman ti Bombo Radyo La Union kenni Fire Chief Inspector Edwin Orejudos, agdama a Fire Marshal ti BFP-San Fernando, kinuna na a maysa a kit-kitaen da a makagapo iti napasamak nga uram ket electrical short circuit.
Posible kunana a sinerrek ti danum ti tudo iti electrical system ti nasao a pasdek, nga isuti nagtaudan ti uram.
Maipalagip a napasamak ti insidente agarop ala 12:45 ti parbangopn idi kalman, Agosto 14, 2025.
Immabot iti maikadwa nga alarma sakbay a naan-anay a naideklara a fire out iti oras ala 1:42 ti parbangon.
Lima a fire trucks ti timmulong iti San Fernando Fire Station a nangsebseb iti uram a pakaibilangan ti Bauang, Naguilian, San Juan, Bacnotan, ken San Fernando City airport fire truck.
Awan ti naipadamag a natay wenno nasugatan iti insidente.
