BR LA UNION – Mapatta-patta a nasurok P16-M a balor ti marijuana iti nadiskubre ken inuram dagiti otoridad ditoy rehiyon uno.
Resulta daytoy ti ballaygi a maika-innem a Marijuana Eradication Operation nga inyuswat ti Police Regional Office 1 (PRO 1), kadwa da ti Philippine Drug Enforcement Agency Regional Office 1 (PDEA RO1), idi Nobyembre 22 agingga 23, 2025, iti nagbeddengan ti Brgy. Licungan, Sugpon, Ilocos Sur, ken Brgy. Tacadang, Kibungan, Benguet.
Pakabuklan a PhP16,260,000.00 ti balor dagiti 81,300 fully grown marijuana plants manipud iti pito a plantasyon nga aglawa ti 13,400 metro kuwadrado.
Ti operasyon ket indaulwan ti Ilocos Sur Police Drug Enforcement Unit (ISPDEU), kabinnulig da ti PDEA RO1-RSET, PDEA RO1-INPO, PDEA RO1-ISPO, 1st ISPMFC, 2nd ISPMFC, ISPIDMU (KIMAT), Sugpon MPS, RMFB1, ken 1st LUPMFC.
Impaganetget manen ni PBGEN Dindo R Reyes, Regional Director ti Police Regional Office 1, a mangnamnama ti publiko a mas lalo pay a papigsaen da iti operasyon ken kampanya kontra iti iligal a droga, iti tulong ti naduma-duma nga ahensya tapno maparmek ti pagtataudan dagiti iligal a droga iti amianan a paset ti pagilian.
