LA UNION – Umaboten iti siyam a tattao iti natay gaputi panagduprak ti bagyo Carina.
Segun iti National Disaster Risk Reduction and Management Council (NDRRMC), dua iti nasugatan ken maysa ti naipadamag a mapukpukaw.
Dagiti uppat a natay ket manipud Zamboanga Peninsula; dua idiay Bangsamoro Autonomous Region in Muslim Mindanao (BARMM) ken saggaysa idiay Northern Mindanao ken Davao Region.
Maysa a barito iti nasarakan a natay kalpasan a nalmes idiay Infanta Bridge idiay Barangay 96, Tondo, Maynila.
Umabot metten iti 179,744 a pamilya iti naapektaran ti bagyo wenno kaibatugan ti 866,483 s tattao.
Mapatta-patta nga umabot iti P8.7 milyon ti damyos iti agrikultura idiay Western Visayas, Zamboanga Peninsula, Northern Mindanao ken BARMM bayat a ti damyos iti imprastraktura ket aganay P700,000 malaksid pay ti damyos kadagiti nadadael a babbalay nga umabot ti P2.5-M.
Innayon pay ti NDRMMC, iti southwest monsoon ket nangigubway ti nakaru a panagtudo iti naduma-duma a paset ti pagilian, a nangrugi pay idi Hulyo 11 ken pinapigsa ti bagyo Butchoy ken Carina.
Nakaibunong metten ti Department of Social Welfare and Development (DSWD) ti P29-M a balor ti tulong kadagiti nagbakwit a pamilya.
