BR LA UNION – Ti “Aldaw Dagiti Banwar” wenno National Heroes Day ita nga aldaw, August 25, 2025, ket addaan ti tema nga, “Isang Diwa, Isang Lahi, Isang Bayanihan” (One Spirit, One Race, One Bayanihan).
Maysa a regular non-working holiday a masel-selebraran tunggal maudi a Lunes iti bulan ti Agosto.
Nabaknang daytoy nga aldaw ti pakasaritaan, nupay namin-adu a daras a nabaliwan ti petsa a panangrambak.
Immuna a narambakan idi October 28, 1931, idi panawen dagiti Amerikado a mannakop babaen ti Act No. 3827 wenno “An Act to Declare the Last Sunday of August of Every Year as an Official Holiday to be Known as the National Heroes Day.”
Ngem nagpaut laeng dayta ti 11 a tawen gaputa idi panawen ti Japanese interregnum, binaliwan ti petsa daydi President Jose P. Laurel tapno igiddan iti Bonifacio Day a November 30.
Saan a nagbayag, daydi sigud a President Elpidio Quirino, ket binaliwan na met ti petsa, nagbalin a maudi a Domingo ti Agosto, maiyannurot iti Administrative Order No. 190, series of 1952, wenno kalpasan ti maikadwa a gubat sangalubongan, ken nagpaut ti dekada.
Idi 2007, nabaliwan manen babaen kenni sigud a President Gloria Macapagal-Arroyo, kalpasan a pinirmaan na ti Republic Act No. 9492, a nangituding ti National Heroes Day a rambakan tunggal maudi a Lunes ti bulan ti Agosto, nga isuti masur-surot agingga ita.
Ti National Heroes Day ket saan laeng a para kadagiti nalatak a banwar nga isuda Dr. Jose Rizal, Andres Bonifacio, GomBurZa, Apolinario Mabini, ngem ketdi amin a Pilipino, dagiti saan nga am-ammo a suldado ken indibiduwal a nangisakripisyo iti biag da idi panawen ti gubat, tapno magun-od ti waya-waya ti Pilipinas manipud kadagiti mannakop nga Espanyol, Hapon, ken Amerikano.
Ti National Heroes Day ket maysa a gundaway tapno lagipen ken subliyanan dagiti adal ti pakasaritaan ken bigbigen dagiti banwar a Pilipino a nangipamatmat ti kinabanwar, kinatured, ken dedikasyon para ti pagilian.
Babaen iti panagaramid ti kina-imbag iti pada a tao ken napudno a panagserbi iti ili, tunggal maysa ket addaan kabaelan nga agbalin a banwar ti Pilipinas.
Happy National Heroes Day!
