BR LA UNION – Mangnamnama iti Philippine National Police (PNP) a bumaba ti bilang dagiti aksidente iti kalsada ken insidente ti pannakalmes ita a Semana Santa manipud iti nangato a datus idi napalabas a tawen.
Gapu daytoy iti namnamaen a panagbaba met ti bilang dagiti agbiyahe gapwanan ti nangato a presyo dagiti produkto petrolyo a ginubway ti giyera idiay Middle East.
Kinuna ni PNP Spokesperson, Police Brig. Gen. Randulf Tuaño, nga umabot ti 919 a tattao ti natay idi napalabas a tawen gaputi reckless imprudence kumpara iti nasurok 800 idi tawen 2024.
Maibasar met iti datos ti PNP Maritime Group, umabot iti 151 drowning incidents ti nailista ti pulisya idi napan a tawen idinto nga umabot laeng iti 90 a kaso ti nailista idi 2024.
Impaganetget ti PNP spokesperson, a nakakad-kadlaw a bimmassit ti bilang dagiti biyahe nga aggapo idiay Manila, agsipudta sumagmamano a kumpaniya ti nagsardeng nga agpasada gapu iti nangato a presyo ti langis.
Nupay kasta, siniguro ti heneral nga agtultuloy a bantayan ti pulisya dagiti insidente ti pannakalmes ken aksidente iti kalsada.
Impaganetget ti opisyal, nga agtalinaed a nakangato ti alerto iti PNP, agraman ti panagdeploy iti naan-anay a manpower iti naduma-duma a lugar.
