BR LA UNION – Maysa a 28-anyos a construction worker ken residente ti Barangay Baraoas, Naguilian, La Union ti naireport a nalmes iti Balili River idi malem ti Agosto 16.
Maibasar iti inisyal a imbestigasyon ti Naguilian Municipal Police Station, agarup alas-kuwatro ti malem idi naginom ti biktima ken ti kaduana. Kalpasan ti panaginomda, nagturong dagitoy iti Balili River a sakop ti Naguilian tapno aglangoy.
Ngem gapu iti maipagarop nga epekto ti nasanger nga inumen, napan iti tengnga wenno adalem a paset ti karayan dagiti dua.
Mapapati a naiyanod ti biktima babaen iti napegges nga ayos ti karayan idinto a ti kadwa na ket nakalasat.
Apaman a naawat ti Naguilian MPS iti report ket nangisayangkat dagiti personnel iti search and rescue operation tapno biroken iti biktima, ngem agingga ita ket mapagarop a saan pay a nasarakan ti bagina.
Segun kenni PMAJ Arcellie O. Pang-ag, agdama a Public Information Officer ti LUPPO, kasapolan a liklikan pay laeng dagiti umili ti agdigos ken aglangoy kadagiti karayan, waig, ken baybay gaputi peligro a gapwanan ti agtultuloy a panagtudo.
Impaganetget na pay a dak-dakkel ti peggad iti panaglangoy nu adda iti impluwensiya ti alkohol, agsipudta mabalin a makaapekto daytoy iti balanse ti bagi ken panunot, a mabalin nga agresulta iti pannakalmes.
Para iti pakabigbigan ti biktima, daytoy ket mapatta-patta nga agtayag ti 5’6”, medium built ti bagi na, fair complexion, ken nakasuot ti black boxer shorts.
Imbalakad ni Pang-ag iti siasinuman a makita iti bagi ti lalaki, a dagus nga ipakaammo iti Naguilian MPS.
