BR LA UNION – Napurnada ti maipagarop a plano ti maysa nga agnobyo nga agtakaw ti motorsiklo kalpasan a natiliwan ti barangay tanod idiay Barangay Bungol, Balaoan, La Union.
Maibasar iti inisyal nga imbestigasyon dagiti otoridad, ti motorsiklo a ginandat nga itaray dagiti suspek ket binulod laeng ti 23-anyos a construction worker manipud iti uliteg na.
Imparada ti biktima ti motorsiklo iti ruar ti Bungol National High School, ngem ginundawayan daytoy ti agnobyo tapno ilibas ti nasao a behikulo.
Segun kenni La Union Police Provincial Office Public Information Officer Police Major Arcellie O. Pang-ag, agpada a residente ti Pangasinan dagiti suspek.
Iti 23-anyos a babae ket taga-Mapandan, bayat a ti 29-anyos a lalaki ket manipud met siyudad ti San Carlos.
Sinita ti barangay tanod ket idi inasetganna dagiti dua, dagus a pina-andar ken pinataray ti lalaki a suspek, rason tapno mabati ti nobya ken maymaysa na nga inarestar dagiti otoridad.
Nupay kasta, ballaygi a naisubli ti motorsiklo kalpasan a naallokoy ti babae a suspek iti nobyo na babaen ti text messages ken tawag, nga isubli na daytoy.
Maibasar iti istorya ti agnobyo a suspek, nagturong da ditoy La Union tapno ag-“rides,” ngem iti panagimbestigar dagiti otoridad ket naamwan nga addaan dagitoy ti maipagarop a negosyo a panaglakwan ti piyesa ti motorsiklo.
Kabayatanna, naaddaan ti katulagan iti agsumbangir a benneg isunga saanen nga intuloy ti biktima a mangidatag ti reklamo.
Nagpalagip met ni Major Pang-ag iti publiko, nangruna kadagiti agkarelasyon nga agtrabaho ti napudno ken liklikan dagiti illegal nga aramid, agsipudta ti negosyo nga agtaud iti kalukwan ket kaatnuman saan nga agballaygi.
