Pasado alas 5:20 ti malem idi nagpatingga ti nationwide ‘National Rally for Peace’ nga insayangkat ti liderato ti Iglesia ni Cristo (INC) ken dimmanon iti 1.8 milion a kamengda ti timmabuno sadiay Quirino Grandstand.
Maysa daytoy kadagiti 13 sites a nakaangayan ti INC nationwide peace rally iti intero a pagilian ket nagdudupudop met dagiti kamengda sadiay Sports Complex iti Ilagan City, Provincial Capitol of Palawan, Sawangan Park iti Legazpi City, Freedom Grandstand iti Bacolod City, Ormoc City Plaza iti Leyte, South Road Properties (SRP) Grounds iti Siudad ti Cebu, Pagadian City Proper iti Zamboanga del Sur, Plaza Divisoria iti Siudad ti Cagayan de Oro, San Pedro Square iti Siudad ti Davao, ken Butuan Sport Complex iti Agusan del Norte.
Kabayatanna, mangnamnama ti Malacañang a ti ‘National rally for peace’ ti mangsilnag kadagiti isyu a sangsanguen ita ti pagilian.
Agtultuloy met ti beripikasyon ti liderato dagiti Society Communicator ken Network International wenno SCAN units ti INC no mano kadagiti kamengda ti naikkan iti medikal a tulong.
