All set aminen ti panagsagana nga ar-aramiden ti liderato ti Iglesia ni Cristo para iti ‘National Rally for Peace’ ita nga aldaw, Enero 13, 2025.
Nalpasen ti entablado nga usaren da, tunggal distrito ket addaan met kadagiti banner a mausar tapno naparpartak a mailasin dagiti kameng ti INC ti lugarda para iti panagrekord.
Adda pay dagiti naipasdek a medical station iti aglawlaw ti Quirino Grandstand, idinto a dua nga LED Television ti naibangon iti entrance ken exit ti grandstand a nasurok a tallo a metro ti kaakaba ken dumanon iti uppat a metro ti kaatiddogda.
Mainayon pay ditoy ket ti impasdek ti INC nga 17 a command stations manipud Padre Paredes Street, Manila agingga Qurino Grand Stand.
Dumanon ti 41 ‘SCAN’ units wenno Society Communicator and Network International ti indeploy ti liderato ti INC manipud Lerma Street, Manila agingga Qurino Grand Stand tapno tumulong kadagiti kapatid a tumabuno iti rali.
Malaksid iti daytoy, adda pay dagiti naiwaras nga outdoor portable toilets sadiay Roxas boulevard a naipasdek met iti uneg ken ruar ti Quirino Grandstand.
Iparit dagiti autoridad iti sango ti Qurino Grandstand nga aglako dagiti sidewalk vendors tapno maorganisar ti kasta a rali.
Naipaserran itay alas-kwatro ti agsapa ti kalsada sadiay Katigbak Drive ken South Drive, Independence Road, north ken southbound lanes ti Roxas Boulevard manipud Katigbak Drive agingga UN Avenue, north ken southbound lanes ti Bonifacio Drive manipud Katigbak Drive agingga Anda Circle, Padre Burgos Avenue manipud Victoria Street agingga Roxas Boulevard, Maria Orosa Street manipud Padre Burgos Avenue agingga UN Avenue, Finance Road mainpud Padre Burgos Avenue agingga Taft Avenue, General Luna Roundtable, ken Kalaw Avenue manipud Taft Avenue agingga Roxas Boulevard.
Adda met dagiti parking areas iti dua a linia ti inner side ti Roxas Boulevard manipud iti UN Avenue agingga iti Padre Ocampo Street, ken dua a linia ti inner side ti Mel Lopez Boulevard manipud iti Anda Circle agingga iti limitasion ti NLEX Connector City.
