Target a madanon ti National Electrification Administration ti 94% energization rate kadagiti amin nga remote households ditoy pagilian ita a tawen.
Daytoy ti impaganetget ni NEA Administrator Antonio Mariano Almeda ken kinunana nga agtaltalinaed a positibo ti ahensia a madanon iti kastoy a target rate.
Segun iti Administrator, prioridadda iti agdama ket ti paset ti Mindanao a nababa pay laeng ti energization rate na kadagiti nasulinek a lugar kadagiti probinsia iti rehion.
Dumanon met ti naituding a pondo ti NEA iti ₱1.627-billion para iti electrification ti nasurok a 22,000 a sangakabbalayan ditoy pagilian.
Malaksid iti daytoy, nangipaay pay ti ahensia iti pondo a dumanon iti P200-M para iti subsidy ti Electric Cooperatives Emergency and Resiliency Fund.
Nangilatang ti ahensia iti pondo nga agdagup iti ₱2-B para iti agtultuloy a Photovoltaic Mainstreaming Sitio Electrification ken Barangay Line Enhancement Programs (SEP/BLEP).
Agtalek ti ahensia a madanon to inton agangay iti 100% electrification rate para inton tawen 2028.
