BR LA UNION – Addan ti person of interest ti Philippine National Police (PNP) iti pannakapapatay ti American marine biologist a ni Kent Carpenter, agtawen ti 73, iti uneg mismo ti pagtaengan na idiay Purok 3, Barangay Ajong, Sibulan, Negros Oriental idi Domingo, Hulyo 12, 2026.
Maibasar iti initial investigation ti Sibulan Police Station, agbuybuya ti telebisyon ti biktima kadwa na ti maipagarop a partner na a 34-anyos a Pinay, idi simrek ti tallo a naka-bonete a suspek ket dagus a pinaltugan da ti ulo ti biktima.
Bayat a ti nasao a Pinay ket immuna a naipadamag a saan a nadangran, ngem idi agangay ket naireport a maipagarop a ginundawayan dagiti suspek.
Maysa a kitkitaen a motibo dagiti otoridad ket panagtakaw, kalpasan nga innala dagiti suspek ti sumagmamano a napapateg nga alikamen ti biktima, kas ti laptop, kuwarta, ken maysa a backpack a naglaun ti sumagmamano nga ID ti biktima.
Nupay kasta, nangbukel PNP-Negros Oriental iti special task group a mangtutok ti nasao a kaso ken mangimbestigar ti amin a posible nga anggulo, nga adda pakainaiganna iti trabaho ken personal life ti biktima.
Kinuna ni PNP Public Information Office chief PCol. Allen Rae Co, nga addan ti nabigbig a person of interest iti kaso, ngem amin a posible a motibo ket maipaspasidong pay laeng iti imbestigasyon.
Dakkel ti naitulong ni Carpenter iti Pilipinas partikular iti marine science community ken maysa isuna a professor ken associate researcher iti Silliman University.
Isuna ti author iti landmark scientific paper a nangideklara iti Verde Island Passage kas “Center of Marine Shore Fish Biodiversity” iti intero a lubong.
Maysa pay a negosyante ni Carpenter a simmangpet ditoy Pilipinas sipud idi 1975.
