BR LA UNION – Nabigbigen dagiti posible a pimmatay iti negosyante a ni Anson Que wenno am-ammo pay iti nagan nga Anson Tan, agraman ti driver na a ni Armanie Pabillo.
Segun kenni PNP Chief Police General Rommel Marbil, posible nga adda maarestar da ita a suspek ngem awan pay ti mastermind.
Maipalagip nga idi Miyerkoles, Abril 9, nasarakan iti bangkay da Que ken ti driver na iti igid ti kalsada idiay Rodriguez, Rizal, kalpasan ti dua a lawas a panagpukaw dagitoy.
Naudi a nakita a sibibiag ni Que idi Marso 29 manipud iti opisina na idiay Valenzuela City a pakasarakan iti negosyo na a landok.
Agpar-parang iti imbestigasyon dagiti otoridad, nga adda pay naun-uneg a makagapo iti napasamak a krimen, malaksid iti kaso a kidnap-for-ransom.
Naamwan pay a namitlo a daras a nagbayad ti ransom iti pamilya ni Que nga umabot amin ti P100 milyon para iti pannakaruk-at na, ngem pinatay latta dagiti suspek dagiti biktima.
Kabayatanna, pinaka-amwan metten ti Philippine National Police (PNP) iti Bureau of Immigration (BI) seknan iti pakabigbigan dagiti suspek tapno saan da nga aglibas ditoy pagilian.
