BR LA UNION – Kinumpirma ni Department of the Interior and Local Government (DILG) Secretary Jonvic Remulla nga exposed iti ‘dark web’ ken adda paglaslasatan a depresyon iti menor de edad a suspek iti pamamaltog iti maysa a pagadalan idiay South Cotabato.
Maibilang dagitoy a kangrunaan a makagapo iti pammaltog ti estudyante, a nakatayan ti dua a pada na nga agad-adal ken mapatta-patta a walo dagiti nasugatan ken agtultuloy nga agpapa-imbag iti ospital.
Inlawlawag ni Remulla nga adda dagiti ‘dark web’ site nga aglem-lemmeng iti uneg ti sumagmamano a partikular a mobile app tapno mangallokoy ken mang-impluwensya kadagiti agtutubo nga agaramid ti krimen.
Maysa pay a makitkita na a dakkel a parikot ket iti nalaka a pannaka-access dagiti agtutubo iti social media.
Gaputi dayta, nakikoordinar ti ahensya iti Department of Information and Communications Technology (DICT) tapno malimitaran ti panang-access dagiti menor de edad iti social media ken maiyadayo dagitoy kadagiti dakes nga elemento.
Inallokoy na pay dagiti nagannak a bantayan iti annak ken kanayon nga i-monitor ti ar-aramiden dagitoy iti internet agraman dagiti makasar-sarita online.
Kabayatanna, impaganetget ti sekretaryo nga awan ti panagkurang dagiti otoridad iti seguridad ti pagadalan agsipudta na-tsek met kunana iti bag ti ubing, ngem naamwan nga inlemmeng na ti paltog iti likudanna.
Inlawlawag ni Remulla nga awan ti plano da a limitaran ti media iti panangi-binglay ti impormasyon partikular dagiti kastoy nga insidente, ken nasken laeng a maamwan ti publiko dagiti pudno a mapaspasamak ken dagiti saan a rumbeng nga aramiden mainaig ti daytoy.
