Dimmanon ti ₱98.6M ti napagkadwa a net worth da Bise Presidente Sara Duterte ken ti asawa na ni Atty. Manases Carpio, kas maibasar iti 2025 Statement of Assets, Liabilities and Net Worth (SALN) da a nangatngato ti nasurok ₱10M nu iyarig ti ₱88.5M idi tawen 2024.
Nakailanad iti SALN nga addaan da ti ₱81.3M real properties, ₱41.4M personal properties, ken ₱24.1M liabilities.
Karaman kadagiti personal properties dagiti motor vehicles nga aggatad ti ₱7.4M para kenni Duterte bayat a ₱4.8M met para kenni Carpio.
Kabayatanna, ₱16M kenni Duterte ken ₱10.8M kenni Carpio ti nakapauneg iti kategorya nga “others.”
Indeklara pay ni Duterte nga isuna ket incorporator ken stockholder ti Metro City Chow Foods manipud 2007 ken stockholder ti Gencorp Industries Inc. manipud pay idi 2013.
Immunan a binabalaw dagiti dadduma a mamanday-linteg ti panagbalin na a board member ken stockholder ti Metro City Chow Foods manipud 2022 agingga 2025.
Segun kenni Cagayan de Oro 1st District Representative Lordan Suan, mabalin a naglabsing daitoy iti probisyon ti 1987 Constitution a mangiparparit para ti Bise Presidente a mangiggem ti sabali pay a posisyon kabayatan nga adda iti akem na ti gobierno.
