Agsagsagana man itan ti North Korea a mangipatulod iti ad-adu pay a soldado da idiay Russia kalpasan a naibus ti adu a bilang ti immuna a wave ti rinibu a tropa da gapo iti Russia-Uraine war.
Segun iti palawag ti South Korea, agsagsagana manen ti North Korea a mangisayangkat iti test-fires ti intercontinental ballistic missile nga agingga a makadanon sadiay Estados Unidos, ket kinuna ti dadduma nga eksperto a saan a nalabit nga aramiden dayta ti lider North Korea a ni Kim Jong Un, aglalo kadagiti addang a mangpakaro lalo iti relasionna kenni US President Donald Trump.
Iti sabali a bangir, makita met ni Kim Jong Un nga ad-adda pay a mapapigsana ti nuclear program ti North Korea no makitinnulong kenni Russian President Vladimir Putin ngem iti pannakisaritana kenni Trump idi 2018-2019 summit.
Nasken a laglagipen a ti North Korea ti maysa kadagiti nangted iti adu a suporta iti Russia ken nakaipatulod dan kadagiti artilleries ken dadduma pay a conventional weapons agraman ti dagiti soldado a dumanon ti agingga 12,000.
Maipagarup a kasukat ti addang ket ti panangipaay ti Russia kadagiti moderno nga alikamen tapno makadevelop pay ti ad-adu ken napigpigsa a nuclear ti North Korea.
Kabayatanna, kinuna ti spy agency ti South Korea idi napan a lawas a mapattapatta a 300 a soldado ti North Korea ti natnatayen ken nasurok a 2,700 ti nasugsugatan.
Maisupadi dayta idi rugrugi ti Enero, kalpasan a pinasingkedan ni Ukraine President Volodymyr Zelenskyy nga agarup 4,000 ti bilang dagiti natay wenno nasugatan a soldado bayat a nababbaba ti pattapatta ti Estados Unidos a dumanon laeng ti 1,200 a soldado ti North Korea ti napapatay.
