Impatayab ti North Korea ti intercontinental ballistic missile test idi Huebes.
Nagtalinaed iti tangatang ti maiparit a NoKor missile iti 86 a minutos ken nadanonna iti distansia a nasurok a 1,000 km.
Daytoy ket maibilang a longest-ever flight a nairekord manipud idi ti kaudian nga intercontinental ballistic missile da idi Disiembre 2023 a nagpaut met iti 73 a minuto iti tangatang ken nakasaklaw iti 1,000 km.
Dimmanon iti 7,000km wenno katupag iti 4,350miles ti kangato ti naipatayab nga ICBM idi Huwebes.
Natinnag daytoy iti kabaybayan iti daya a kosta ti NoKor.
Nangaramid ti NoKor iti sabali pay nga intercontinental ballistic missile test iti sidong ti rehimen ni Kim Jong Un kas panangipakita iti panagsuppiat kalpasan a binabalaw ti South Korea ken America ti tignayna a mangibaon kadagiti soldado iti kaalyadoda a Russia.
Segun iti Defence Ministry ti South Korea, panggep ti missile test a makaaramid kadagiti armas a mabalin a maipatayab nga ad-adayo ken nangatngato.
Mainaig iti daytoy, mangipakat ti SoKor kadagiti baro a sanctions iti NoKor kas sungbat iti naipatayab nga intercontinental ballistic missile.
Inawagan ti America ti tignay ti NoKor a nalawag a panaglabsing iti adu a resolusion ti UN Security Council.
Kabayatanna, nangiruar ti lider ti North Korea a ni Kim Jong Un iti statement iti isu met laeng nga aldaw a pannakairugi ti missile test.
Kinunana a daytoy ket maysa a demonstrasion ti sungbatda kadagiti kabusor ken inladawanna daytoy a kas maysa nga ‘appropriate military action’.
