BR LA UNION – Dandani amin a barko iti sidong ti Offshore Combat Force ti Philippine Fleet (PF) ket addaanen ti anti-submarine warfare (ASW) capabilities, segun iti Philippine Navy.
Sumagmamano kadagiti barko a panggubat nga addaan iti kabaelan ket ti guided-missile frigate a BRP Jose Rizal (FF-150) ken sister ship a BRP Antonio Luna (FF-151).
Dagiti dua ket agpada nga adda kabaelanda a maka-detect ken dadaelen dagiti submarine.
Karaman pay ditoy ti dua nga AW-159 “Wildcat” ASW helicopter nga addaan ti dipping sonar technology ken anti-submarine torpedos.
Iti dua nga air assets ket kadwa ti BRP Jose Rizal ken BRP Antonio Luna.
Ti BRP Conrado Yap (PS-30) a sigud nga indonar ti South Korea ket addaan ti kapada a kabaelan, agraman ti tallo a Gregorio Del Pilar-class offshore patrol vessels a sigud a nakabilan ti submarine-detecting sonar.
Segun kenni PN spokesperson Capt. John Percie Alcos, ti dadduma pay a warship nga immunan nga inorder ti Pilipinas ket addaan ti kapadpada met laeng a kapabilidad.
Karaman ditoy ti dua a guided missile corvette ken innem nga offshore patrol vessels nga agdama a maar-aramid idiay South Korea ken manamnama a maideliver iti sumaruno a dua a tawen.
