Kinalampag ni Senador Sherwin Gatchalian ti Energy Regulatory Commission (ERC) a harangen ti sistema a One-Time Big-Time wenno dakkel a pagngatoan ti singir ti kuryente dagiti distribution utilities.
Kinunana a nasken ket staggered wenno in-inut metlaeng ti pannakaipatungpal daitoy tapno saan a mabigla ti bulsa dagiti ordinaryo a konsumer.
Ti nasao nga in-inut a panagngato ti singir ket magudwa ti sumagmamano a billing cycle para ti praktikal a solusyon a saan a makasakit iti ekonomiya ken ti publiko.
Impalagip met ti senador a ti sektor ti enerhiya ket maysa a regulated industry kasta met a ti kangrunaan a mandato ti ERC nga agtignay, agbalin a vigilante, ken salakniban dagiti umili kontra saan a nainkalintegan a babayadan a mangpadpadagsen ti inaldaw a gastos.
Babaen ti agraraira nga Electric Power Industry Reform Act (EPIRA), limitado laeng ti bileg ken panakibiyang ti gobierno iti direkta a panangituding ti presyo ti kuryente iti merkado.
Nupay kasta ket inlawlawag met ni Gatchalian nga addaan latta ti bileg ti gobierno a makiballaet ken mangaramid kadagiti maiyannatop nga addang, nangruna ditan nu ti rason ti panagngato ti presyo ket ti kinakurang ti supply ti enerhiya.
