Imbutaktak ni Senador Panfilo “Ping” Lacson a maysa nga opisyal ti Department of Public Works and Highways iti maipagarop a nagkiddaw ti ‘insertion’ wenno kanayunan a pondo iti 2026 National Expenditure Program.
Iti nasao nga opisyal ket ni DPWH Undersecretary Maria Catalina Cabral – nga isuti timmawag iti staff ni Senate Minority Leader Tito Sotto III tapno damagen no tarigagay da ti agsubmitir dagiti singasing a proyekto a mabalin nga maisingit iti budget.
Kinumpirma daytoy ni Sotto ngem pinagkedkedan na iti nadakamat a diaya bayat a ni Cabral ket saan pay a nangipaay ti waragawag maipanggep iti isyu.
Malaksid iti insertion ket timpuar pay dagiti dadduma nga isyu ti ahensia, pakairamanan dagiti ghost projects a saan pay a nakumpirma ti Undersecretary iti maudi a panagdingeg idiay Senado.
Kabayatanna, inaklon ni DPWH Secretary Vince Dizon a rumbeng a matapyasan iti budget ti ahensia agsipudta adda dagiti proyekto a saan pay a nalpas wenno saanen a kasapulan kadagiti dadduma a lugar.###
