REGION 1 – Agtultuloy iti Department of Transportation (DOTr) babaen ti Land Transportation Office (LTO) iti panangipatungpal ti “Oplan Biyaheng Ayos!: Semana Santa and Summer Vacation 2026” iti intero a Region 1 tapno masigurado iti naurnos ken natalged a panagbiyahe dagiti umili ita a Semana Santa ken panawen ti summer vacation.
Segun iti LTO, mangipatungpal dagiti personnels-da ti regular a panag-inspeksion kadagiti terminal dagiti pampubliko a lugan tapno masigurado iti roadworthiness wenno naimbag a kondision dagiti lugan sakbay a mapalubosan a bumiyahe. Panggep daytoy a mapabassit iti peggad iti kalsada ken masigurado ti kinatalged dagiti pasahero.
Nangipasdek met iti ahensia ti help desk kadagiti kangrunaan a lugar ken terminal tapno masungbatan dagus dagiti saludsod ken kasapulan dagiti motorista ken commuter. Adda met ti on-site assistance para kadagiti agkasapulan ti dagus a tulong bayat ti panagbiyaheda.
Kabayatanna, mangted met iti LTO ti Information, Education, and Communication wenno IEC materials tapno mapalawa iti pannakaammo ti publiko maipanggep iti road safety ken dagiti pagannurotan iti naurnos a panagbiyahe.
Uray pay no panawen ti holiday, agtultuloy a naka-deploy dagiti personnels ti LTO Region 1 iti naduma-duma a terminal ken kangrunaan a lugar tapno agserbi iti publiko, nangruna kadagiti aldaw a manamnama a dakkel ti bilang dagiti pasahero ken luglugan.
Dagitoy nga aktibidad ket agtultuloy a maipatpatungpal iti intero a panawen ti panagbiyahe tapno mapagtalinaed iti presensia ti ahensia kadagiti lugar a masapul unay ti serbisioda. (Report by Bombo Jordan)
