Binabalaw ni Senador Ronald “Bato” dela Rosa dagiti oportunista a kameng ti Kamara a kunana a puro pammadayaw ii ipatpatungpal ti administrasion ni Duterte ti war on drugs ngem nagbaliw ti tignay da kalpasan a simrek ti baro nga administrasion.
Bayat ti panangibagana a maawatanna a paset daytoy ti politika, kinuna ni Dela Rosa a naladingitan isuna iti kinapudno a nalipatan dagitoyen a mammanday-linteg ti prinsipioda.
Nupay kasta, kinuna ni Dela Rosa a saanna nga itudtudo ti amin a kongresista ken dinakamat na nga adda dagiti sumagmamano a kameng ti Kamara a pilpilien lattan iti agulimek gapu ta dida kayat a maparurod ti liderato ken dagiti kameng ti majority bloc.
Para kenkuana, ti imbestigasion kadagiti EJK ken ti war on drugs ket “very redundant,” nu sadino dagiti isu met laeng a grupo ti tattao ket nagtestigo kadagiti isu met laeng a claims ngem dagiti kaso ket maipila paylaeng ti sango dagiti korte.
Segun kenni Dela Rosa, awan ti imbitasion manipud iti lower house para kenkuana a tumabuno iti joint investigation kadagiti EJKs, war on drugs, ken dagiti POGO.
Iti agdama, sumangsango ni Duterte iti imbestigasion ti International Criminal Court (ICC) mainaig iti mapapati a crimes against humanity gapu iti drug war-related killings bayat ti terminona.
Idi laeng Hulio ket kinuna ni dati a senador Antonio Trillanes IV a ni Dela Rosa ken uppat pay a sigud ken aktibo nga opisial ti polisia ket na-tag kas suspek iti imbestigasion ti ICC.
Maibasar kadagiti rekord ti polis, dimmanon iti agarup 6,000 ti natay iti war on drugs ngem kinuna ni Attorney Chel Diokno iti House committee on human rights a basar iti 2017 yearend accomplishment report ti administrasion ni Duterte, agdagup iti 20,322 a tattao ti natay iti nadakamat nga operasyon.
