Naiwarasen ti Department of Social Welfare and Development (DSWD) ti nasurok P4.1M nga humanitarian assistance para kadagiti pamilya nga apektado ti panagduprak ti kallabes a Bagyong Crising.
Impadamag ni DSWD spokesperson Irene Dumlao nga impatulod da kadagiti apektado a pamilya ti inisyal a tulong a buklen dagiti family food packs ken non-food items.
Maibasar ti datos manipud DSWD ken Office of the Civil Defense (OCD), dumanonen ti agingga 68k a pamilya a buklen dagiti 215K nga indibidwal ti apektado ti panagduprak ti bagyo ditoy Ilocos Region, idiay Cagayan Valley, Central Luzon, MIMAROPA, Bicol Region, Western Visayas, Central Visayas ken Zamboanga Peninsula. Temporario met nga agnanaed ti aganay 5,400 nga indibidwal kadagiti evacuation centers.
Segun kenni Assistant Secretary Dumlao, agtultuloy a nakabantay dagiti field offices ken quick response teams da iti sitwasyon kadagiti hazard prone a lugar. Innayon na a nakadeploy dagitoy tapno makibinnulig kadagiti government units ken makaipaay iti madagdagos a tulong kadagiti agkasapulan.
