LA UNION – Agtultuloy iti isay-sayangkat nga imbestigasyon ti Bauang PNP iti maipagarop a napasamak a robbery hold-up, idiay Barangay Palugsi Limmansangan, Bauang, La Union.
Kinuna iti Bombo Radyo La Union ni C/Inspector Joel Lagto, agdama a chief-of-police idiay ili ti Bauang, mangisayangkat da iti naun-uneg nga imbestigasyon maipapan iti nasao nga insidente, tapno maamwan ti pudno a napasamak.
Immuna ti daytoy, agsubli koman iti opisina da dagiti tallo a lallaki a naglugan iti maysa a delivery truck kalpasan a nag-deliver dagitoy ti softdrinks, idiay Barangay Palugsi Limmansangan, idi maipagarop a kellaat a sinaed ida ti uspek nga armado ti paltog.
Nagsardeng met iti truck ken linukatan da pay iti tawa ti behikulo, kasaruno iti panangi-paturong ti suspek iti paltog kadagiti biktima kagiddan ti panangideklara na a hold-up.
Nabigbig dagiti biktima nga isuda: Francisco Gomez, 36, salesman; Roberto Garcia, 29, helper, agpada a residente ti Barangay Calumbaya ti nasao met laeng nga ili; ken ni Alberto Cariño, 52, driver, ti Parian Este, Bauang, La Union.
Kalpasan a naala ti saan pay a nabigbig a suspek iti nasao a kantidad ti kuwarta manipud iti salesman, ket dagus a naglibas daytoy babaen iti panaglugan na iti motorsiklo.
