LA UNION – Nangrugin a mailako ti nalak-laka bagas a magatang iti presyo a P43 kada kilo iti kadiwa stores ti Department of Agriculture idi kalman, Oktubre 11.
Daytoy ket mas nababbaba ti P2 kumpara iti inisyal a mailaklako a P45 kada kilo ti bagas iti sidong ti Rice for All Program.
Ti nasao a programa ket naiyuswat idiay Barangay Daang Bakal idiay Mandaluyong City.
Segun kenni DA Secretary Francisco Tiu Laurel Jr., maragsakan iti nabara a panangawat ti publiko iti programa ti gobyerno.
Inlawlawag ti sekretaryo nga awan ti irwar a pondo ti ahensiya tapno i-subsidize iti bagas agsipudta iti aktwal a presyo manipud kadagiti mannalon ket direkta a mailaklako kadagiiti aggat-gatang.
Impaganetget pay ti DA chief a ti P43 kada kilo a bagas ket saan a budol ken saan a malugi iti gobyerno ken kadiwa ditoy.
Mangnamnama iti sekretaryo nga agtultuloy iti programa agsipudta adda iti umdas a suplay ti bagas a mailako agingga inton Pebrero sumaruno a tawen.
Kabayatanna, nupay awan ti limitasyon iti panaggatang ti P43 kada kilo a bagas, immapela ti sekretaryo iti publiko a gumatang laeng ti umdas nga usaren wenno i-konsumo ti pamilya ken saan nga aramiden a negosyo.
