Binisita ni Philippine Air Force Commanding General Lieutenant General Arthur Cordura dagiti napateg a pasilidad iti West Philippine Sea.
Nangisayangkat ti hepe ti PAF iti 2-day field visit sadiay Antonio Bautista Air Base (ABAB), Palawan ken Pag-asa Island manipud Enero 14 agingga 15 ti agdama a tawen.
Impaganetget ti panagbisita ti hepe ti PAF kadagiti kastoy a lugar ti panagkumit ti Philippine Air Force iti national security ken ti pagsayaatan dagiti personnel-da.
Nabara ti panangsangaili dagiti tropa a nakapuesto iti Antonio Bautista Air Base kenni Teniente Heneral Cordura nga indauluan ni Tactical Operations Wing West (TOWWEST) Commander Brigadier General Erick Escarcha.
Kabayatan ti isasarungkarna, nagturong ti opisial kadagiti nadumaduma a pasilidad ken nakilanglangen kadagiti tropa a nakadestino sadiay.
Nagturong pay ti PAF Commander sadiay Balabac Island a maysa nga estratehiko nga Enhanced Defence Cooperation Agreement (EDCA) site nga area of responsibility ti Tactical Operations Wing West ken addaan iti napateg nga akem iti pannakapapigsa ti kabaelan ti pagilian maipapan iti depensa, panangitandudo iti regional security ken panangpalaka kadagiti panagtitinnulong kadagiti humanitarian ken disaster relief operations.
Bimmisita pay ti hepe ti PAF sadiay Pag-asa Island iti WPS tapno pasingkedanna ti saan nga agkupas a dedikasion ti ahensya iti panangsalaknib iti kinasoberano ti pagilian.
