Kinontra ti Malakanyang ti waragawag ni Vice President Sara Duterte a panagpolitika ti direktiba ni Presidente Ferdinand Marcos Junior a paimbestigaran ti kontrobersiya ti PrimeWaters a kukua dagiti Villar.
Segun kenni Palace Press Officer Undersecretary Claire Castro, awan ti kinapudno ti banat ti Bise Presidente agsipud a mismo nga customers ti nasao nga water service provider ti agrereklamo gapo ti saan a nasayaat a serbisyo daitoy.
Innayon na met a namnamaen dan iti maibaga ti Bise Presidente agsipud ta awan met ti nasayaat a sao manipud kenkuana a pumabor kenni Presidente Marcos Junior ken ti adinistrasyon na.
Karit ita ni Usec Castro kenni VP Sara a ti aniaman kuma a diskusyon manipud kenkuana ket mai-‘level up’ ti ‘rason sa rason’ ken datos sa datos’ a saan a panay dinadakes a sao.
Impaganetget na nga obligasyon ti gobierno ken ti Presidente a sungbatan ti riri dagiti Pilipino isu a mapaimbestigaran iti PrimeWaters.
Iti agdama ket isaysayangkaten ti Local Water Utilities Administration (LUWA) ti imbestigasyon mainaig iti daitoy a kontrobersiya kas maiyannurot ti pammilin ni Presidente Ferdinand Marcos Junior, a nagtaud metlaeng ti reklamo dagiti customers.
Ti PrimeWaters ket addan kadagiti 73 joint ventures kadagiti local water districts ti nagduduma a paset ti Pilipinas. Kaadwan kadagiti nagreklamo ket manipud Bulacan, Cavite, Laguna, Pangasinan, ken Bohol.
Kabayatanna, nagkedked met ni Castro a mangibaga nu anya ti posible a sanctions para ti nasao a water service provider.
