LA UNION – Masampaan iti kaso a homicide dagiti uppat a miyembro ti pamilya a maipagarup a nangbugbog iti kaarrubada agingga a matay daytoy idiay Barangay Rissing, ili ti Luna, La Union.
Iti report a nakalap ti Bombo Radyo manipud iti Luna Police Station, gapu ta natay ti 45-anyos a biktima a ni Lucilito Yu idiay ospital kalpasan ti sumagmamano nga aldaw idi a napasamak ti pannakabugbogna ket maisagsaganan ti kontra kadagiti suspek nga agassawa nga isuda Loreto ken Rodina, karaman ti anakda nga isuda Jeffrey, Adrian ken Jayson Merindo.
Immuna iti daytoy, kalpasan iti maipagarup a panangdangran ti pamilya Merindo iti biktima ket naaddaan iti panagdengngeg ti reklamo iti Lupong Tagapamayapa iti nasao a barangay ngem saan a nagtinnunos iti dua a benneg maipapan ti medical expenses.
Kalpasan iti sumagmamano nga aldaw ket naiturong iti ospital ti biktima gapu ti sagsagabaenna a sakit iti bagi ken naduktalan a natukkol iti paragpag daytoy gapu ti pannakakabkabil kenkuana dagiti suspek.
Saan a nagpaut idiay ospital ti biktima gapu ta natay met laeng daytoy.
Maipagarup nga adda ti daanen a susik iti baetan ti biktima ken iti nasao a pamilya.
