Pinaglibakan ti Department of Justice (DOJ) ti panangaprobar ti plano a panagbiahe ballasiw-taaw ni sigud a Department of Public Works and Highways (DPWH) Secretary Manuel Bonoan.
Segun kenni Justice Secretary Jesus Crispin Remulla, saan da a pinalubosan ti panagbiahe ni Bonoan agturong Estados Unidos para ti banag maipanggep medikal ti asawa na.
Nupay nagpakada ti sigud a sekretaryo, inlawlawag ti DOJ nga inawat wenno “in-note” laeng ti prosekusyon ti surat na ken saan nga inaprobaran.
Maisupadi daitoy iti waragawag ni Bonoan nga adda iti pammalubos ti ahensya a pumanaw isuna ditoy Pilipinas.
Innayon pay ti DOJ nga awan iti mandato da a mangipaay ti aniaman a permiso wenno lapdan ti siasino nga indibidwal nga agbiahe paruar ti pagilian agsipud ta karbengan met daitoy ti amin nga umili.
Gapo iti naipaulog a direktiba ti korte, saan a makabiahe ni Bonoan ken dagiti dadduma pay a respondents nga awan iti pammalubos da.
Maipalagip a nangiruar ti precautionary hold departure order ti Manila Regional Trial Court Branch 52 kontra kada Bonoan, Jinggoy Estrada, sigud a Public Works Undersecretary Roberto Bernardo, Henry Alcantara, ken Gerard Opulencia seknan ti reklamo a plunder ken dadduma pay a kaso.
Kabayatanna, inbinglay met ni Justice Spokesperson Atty. Mico Clavano nga adda latta ti remedyo dagiti respondents nu kayat da iti rumuar ti pagilian – daitoy ket ti panangipila ti mosyon sadiay korte tapno ma-lift ti precautionary hold departure order.
