BR LA UNION – Mariknan dagiti babassit a negosyo, partikular dagiti agtagikua ti karinderya ken panganan, ti dakkel nga epekto iti panagngato ti presyo dagiti kangrunaan a kasapolan da iti negosyo, kas koma iti liquefied petroleum gas (LPG).
Segun kenni Joy Casimiro, maysa a carinderia owner a nakabase ditoy siudad, maap-apektaranen ti negosyo ken panagbiagda ti agsasaruno a panagngato ti presyo dagiti produkto a petrolyo.
Kinuna na nga awan ti maaramidan da nu saan a sumurot iti mapas-pasamak tapno maituloy ti operasyonda.
Inbinglay ni Casimiro a ti sigud a ₱60 agingga ₱70 a singir da iti budget meal, ket nagnayon wenno impangato da itan ti ₱5.
Kagiddan ti panagngato ti sing-singiren da itan a bayad, kinuna na a madlaw ti panagbaba ti bilang dagiti kustomerda.
Aminado ni Casimiro nga adu a customer ti agsalimetmet itan ti kuwarta ken agbalon da lattan ti taraon tapno saan a makanayon iti gastos.
Iti tengnga dagitoy a karit, impaganetget ni Casimiro nga agtultuloy latta ti negosyona para iti pamilyana, nangruna para kadagiti annakna nga agad-adal.
Kas maysa nga ina ken negosyante, agtrabaho latta daytoy a napinget ngem napateg ti panag-badyet ita a panawen tapno makagiddan iti panagngato ti presyo dagiti gagatangen, babayadan, ken serbisyo.
