Impasigurado dagiti lider ti Kamara a ita nga 2025 ket agtultuloy a mapapigsa ti oversight function ti Kongreso tapno maitandudo ti transparency, accountability, ken umno a panagturay iti pagilian.
Segun kenni Deputy Speaker ken Quezon Representative David “Jay-Jay” Suarez, babaen ti panangidaulo ni House Speaker Ferdinand Martin Romualdez, saan nga agpaabak ti Kamara iti panangaramatda kadagiti pagrebbengan para iti pagimbagan ti Pilipinas.
Sumagmamano kadagiti kangrunaan nga imbestigasion ti Kamara iti napalabas a tawen ket ti illegal Philippine Offshore Gaming Operators (POGO) ken koneksionna iti illegal drug trade, money laundering, ken extrajudicial killings, kasta met ti suplay ken nangato a presio ti bagas.
Naipamaysa pay ti Kamara ti umno a pannakausar ti pondo ti umili, isu nga inimbestigaranna a nalaing ti mapagduaduaan a panaggasto iti kompidensial a pondo ti Office of The Vice President ken ti Department of Education.
Inlawlawag ni House Majority Leader ken Zamboanga Representative Manuel Jose Dalipe a ti nagduduma nga imbestigasion ken panagdengngeg ket paset ti kinaepisiente ti Kamara iti panag-draft kadagiti linteg ken mangipakita iti dedikasion a mangpennek kadagiti kasapulan dagiti Pilipino.
Innayon pay ni Dalipe a kritikal dagiti imbestigasion dagiti komite ti Kamara iti akem a mangpasayaat iti panagturay ti pagilian ken mangbukel kadagiti addaan kaipapananna a polisia.
