Pormal a nangrugi idi kalman, Hulio 17, iti panagrambak ti National Disability Rights Week 2026 babaen ti maysa a kick-off program a naisayangkat idiay SM City La Union.
Indauluan ti Gobierno Siyudad ti San Fernando, babaen ti Persons with Disability Affairs Office (PDAO), iti programa nga addaan panggep a palawaen iti pannakaammo ti publiko maipanggep kadagiti karbengan, pagsayaatan, dignidad, ken napateg a partisipasion dagiti persons with disabilities (PWDs) iti komunidad.
Segun kenni Dr. Mark Anthony B. Inocencio, Head ti PDAO, nangisagana iti lokal a gobierno ti maysa lawas a serye dagiti aktibidad ken serbisio tapno ad-adda a mapapigsa iti suporta para iti sektor dagiti PWD.
Karaman kadagiti naikeddeng nga aktibidad iti libre a legal consultation nga idauluan ti Integrated Bar of the Philippines (IBP), a mangtalantan dagiti agdama a linteg ken jurisprudence nga adda pakainaiganna iti karbengan dagiti PWD.
Mangipaay met ti gobierno siyudad dagiti manipulative learning materials ken dadduma pay nga alikamen para iti panagisuro, karaman dagiti musical instrument, para kadagiti Special Education (SPED) schools ditoy siyudad.
Maysa met kadagiti tampok ti panagrambak iti panangiyusuat ti Disability Code of the City of San Fernando, maysa a lokal nga ordinansa nga addaan panggep nga ad-adda pay a mapapigsa iti panangtaripato ken panangitandudo dagiti karbengan ken pagsayaatan dagiti persons with disabilities iti siyudad.
Kabayatanna, nagpanawagan ni Dr. Inocencio iti publiko nga itantudo iti kultura ti inclusivity, panagrespeto, ken panangawat kadagiti persons with disabilities.
Innayon na a dagiti PWD ket addaan ti napateg a paset ti nadumaduma a sektor ti komunidad ken nasken laeng a maipaayan ti patas nga oportunidad, panangawat, ken suporta tapno naan-anay nga agbalin a paset iti panagdur-as ti komunidad.
Inallukoy na iti publiko a liklikan iti aniaman a klase ti diskriminasion, stigma, ken berbal a pananguyaw kontra kadagiti persons with disabilities, imbes ket itandudo iti maysa nga inklusibo a komunidad a pakabigbigan ken maipapaayan importansia iti kabaelan ti tunggal maysa.###
