Papaimbestigaran ni Senator JV Ejercito idiay Senado ti napartak a panagsaknap ti online gambling ken online lending ditoy Pilipinas.
Agtalek ni Ejercito a nasken a maimbestigaran daitoy agsipud ta agparparang a dakdakkelen a pangta kadagiti Pilipino iti online gambling nu idasig iti Philippine Offshore Gaming Operators (POGO) a target met ket dagiti foreign nationals.
Manipud iti impila na a resolusyon, nadakamat ti nalawa nga aktibidad dagiti Pilipino mainaig ti online gambling nga uray dagiti minimum wage earners, Overseas Filipino Workers, ken dagiti menor-de-edad ket na-adiken gapo iti accessibility na kadagiti smartphones ken e-wallet application.
Nakalanad pay a lalo a ma-adik dagiti Pilipino iti online gambling gapo iti kinalaka ti panagusar kadagiti e-wallets ken digital financial services.
Kadagiti mismo a mobile phone applications ti e-wallet ket makitan dagiti nagduduma a serbisyo a maidiaya, pakairamanan ti online gambling kas iti ay-ayam a “scatter”.
Kinuna ni Ejercito a ti sigud a pampalipas laeng iti oras ket mangdaddadael itan iti biag, nangruna iti financial wellbeing dagiti Pilipino kasta met iti relasyon iti pamilya.
