Ipainget ti Philippine National Police (PNP) ti panagsagana ken panagbirokda ken ni Pastor Apollo Quiboloy ken dagiti uppat pay nga akusado a kakadwa na.
Segun ken ni PNP Spokesperson Colonel Jean Fajardo, adalen a naimbag dagiti polis no ania ti wagas da ita, nangruna ta adda dagiti inosente a mamatmati kenni Quiboloy a nakapalikmut ken mangbanbantay iti Kingdom of Jesus Christ (KOJC) compound, a mapapati a paglemmengan ti pastor.
Segun ken ni Fajardo, mabalin pay laeng ti sumagmamano nga aldaw tapno inspeksionen dagiti pasdek iti uneg ti 30 ektaria a compound a kunana a maysa kadagiti karit a sangsanguenda.
Kayat ti PNP nga ipaawat kadagiti mangsupsuporta iti pastor a saan a panggepda ti mangdangran wenno mangpalawa iti parikut, isu nga agtultuloy ti panagapelada ken ni Quiboloy ken uppat pay nga akusado a respetuen iti proseso.
Inulit ni Fajardo a saan a ti PNP ti nangipaulog iti arrest warrant no di ket ti National Bureau of Investigation (NBI) ken ipatpatungpalda laeng daytoy.
Kalpasan daytoy, impanamnama ni Fajardo nga ikonsiderarda ti napasamak idi Hunio 10 a nakaiserbianda iti arrest warrant ken ni Quiboloy iti mismo a KOJC Compound a nagresulta iti riribuk iti nagbaetan dagiti polis ken dagiti mangsupsuporta iti pastor.
Segun kenni Fajardo, saan a kontra iti PNP ken dagiti ahensia ti gobierno iti KOJC nu di ket panangipatungpal laeng iti legal order nga impaulog ti korte iti espesipiko a tao ken saan nga iti organisasion.
Immun-unan a naireport ni Police Brigadier General Nicolas Torre III a ti compound ket addaan iti underground, hangar, ken tunnel nga agturong iti Davao Airport, segun ken ni Fajardo, uray idin ket saanen a nalimed daitoy ken karaman payen kadagiti ikonsiderarda.
Kabayatanna, sinigurado ti PNP nga adda dagiti checkpoint iti asideg ti lugar tapno mamonitor ti garaw ti pastor ken mataginayon ti kinatalged ti publiko.
