Apurado itan ti pannakikoordinar ti Department of Foreign Affairs (DFA) kadagiti otoridad sadiay Czech Republic tapno mapapartak ti deportasyon pasubli ditoy Pilipinas ti sigud a mamanday-linteg nga itan ket pugante a ni Elizaldy “Zaldy” Co kasaruno ti pannakaarestar na idiay Prague.
Segun kenni DILG Secretary Jonvic Remulla, mabalin a maipasubli ditoy pagilian ti sigud nga opisyal iti las-ud ti maysa agingga tallo a lawas, nupay naaddaan ti bassit a komplikasyon agsipud ta awan iti imet na a travel documents.
Immunan a pinasingkedan ni Presidente Ferdinand Marcos Jr. ti pannakaarestar kenni Co, a siyam a bulanen nga aglemlemmeng idiay ballasiw-taaw.
Inton makasangpet ditoy Pilipinas ket maipasidong isuna ti physical examination sadiay Kampo Crame sakbay a maipasango iti Sandiganbayan para ti arraignment ken detensyon bayat a maur-uray ti desisyon ti korte kadagiti kaso na.
