BR LA UNION – Inwaragawag ni Commission on Elections Chairman (COMELEC) George Erwin Garcia a ti pannakaitantan ti panag-imprenta dagiti balota ket ‘first-time’ nga inaramid ti komisyon.
Daytoy ket gapu iti Temporary Restraining Order (TRO) nga inruar ti Korte Suprema mainaig iti pannaka-diskuwalipika ti sumagmamano a kandidato, para iti national ken lokal nga eleksiyon, isu a dagus a sinurot ti poll body.
Maapektaran amin a panagsagana a mainaig iti balota gapu iti panagsardeng ti panagimprenta.
Kas pagarigan, masayang ti dandani 6 a milion a balota a na-imprenta gaputa saanen a mabalin nga usaren ken masapul a ma-imbentaryo nga umuna tapno maipatulod iti Commission on Audit (COA).
Mapattapatta a ti nasayang a gatad para iti daytoy ket agarup 150 a milyon pisos.
Segun kenni COMELEC Chairman Garcia, kasapulan a mabaliwan amin a panagsagana a mainaig iti panagimprenta kadagiti balota, kas iti Election Management System, database ti komisyon, serialization ti tunggal nagan iti balota ken ti baro a ballot face template a maipablaak.
Ket gapu iti panangproseso manen kadagitoy, kinuna ni Garcia a naan-anay a nataktak ti pannakayimprenta dagiti balota ken amin a panagsagana para iti daytoy.
Mainaig iti daytoy, inwaragawag met ni COMELEC Chairman Garcia nga uray ti mock elections a mapasamak koma inton Enero 18 ket maitantan inton Enero 25 tapno ad-adu ti panawen a maimprenta balota.
Kinunana pay a namnamaenna ti pannakairuar ti baro a ballot face template inton Lunes wenno Martes ti sumaruno a lawas.
