BR LA UNION – Posible a makairwaren ti pangngeddeng ti Senate Impeachment Court iti impeachment case ni Vice President Sara Duterte inton katengngaan agingga agtapos ti Nobyembre, segun kenni Senate President Sherwin Gatchalian.
Iti maysa nga interview, kinuna ni Gatchalian a target da a maileppas ti panagusig ken makaiyetnag ti desisyon sakbay nga agtapos ti Nobyembre, nupay aminado isuna a mabalin nga agbaliw pay ti iskedyul depende iti taray ti panagdengngeg.
Segun kenni Gatchalian, namnamaen a maileppas ita a lawas wenno iti sumaruno a lawas iti presentasyon ti prosecution iti Article 2 wenno ti alegasyon seknan iti unexplained wealth ken sumaruno iti Article 4 wenno bribery sakbay a naan-anay a maisublat iti defense presentation.
Mangnamnama ti Senate President nga agbalin a mas naparpartak ti panagusig iti biang ti depensa agsipudta nasanayen dagiti partido ken impeachment court iti proseso.
Pinatta-patta na nga agpaut ti 30 agingga 45 nga aldaw iti defense presentation, ngem impaganetget na a personal estimate laeng daytoy ken mabalin nga agbaliw pay maibasar kadagiti testigo a maisango ken dadduma pay a panagbaliw iti iskedyul.
Immunan nga imbaga ni Gatchalian a tarigagay na a maileppas ti impeachment proceedings ken maaddaan ti pangngeddeng sakbay ti paskua.
Kabayatanna, maipalagip nga immunan nga imbaga ni Senate Impeachment Court spokesperson Atty. Reginald Tongol a mabalin nga umabot agingga Disyembre 16 ti panangirwar ti pangngeddeng nu usaren ti depensa iti sibubukel a 30 nga aldaw a nailatang kadakuada para iti presentasyon ti ebidensya.
