Ibilbilang a balligi ti babbai ni Gabriela Party-list Representative Arlene Brosas ti desisyon ti Commission on Elections (Comelec) 2nd division nga idiskwalipikar ni Pasig City Congressional bet Attorney Christian Sia.
Mainaig paylaeng daitoy ti nagbalin nga angaw ti abogado ti maysa a campaign rally a mabalin a maki-abay kenkuana a maturog ti maminsan makatawen dagiti makarikrikna ti liday a single moms nga binulan paylaeng nga agreregla.
Nakaragsakan ni Brosas a ti umuna a gundaway ti pakasaritaan ti Pilipinas ket adda ti kandidato a nadiskwalipikar gapo iti aksyon wenno waragawag kontra kadagiti babbai.
Nagyaman pay ti Representante iti desisyon ti Comelec a pabor kadagiti solo mothers a biktima ti kaawan ti respeto, pananginsulto, panagbastos, ken panangwanyak kas iti waragawag ni Sia.
Mangnamnama met isuna a daitoy a pasamak ket agserbi kas ‘wake-up call’ iti tay-ak ti politika nga aniaman nga addang kontra kadagiti babbai ket saan a maiyannatop para kadagiti public servants agsipud ta daitoy ket iresponsable ken nakaar-aryek.
