Agtultuloy ti nabara a saritaan seknan ti ‘Konektadong Pinoy’ bill (KPB), maysa a singasing a gakat a panggep a papigsaen ken papartaken ti internet connectivity ditoy Pilipinas.
Bayat nga innem a tech groups itan ti nangipeksa ti panagsuporta, nainget da met a kinontra ti data localization provision a mangbilbilin kadagiti digital data ket mabalin laeng a maiproseso ditoy uneg ti pagilian.
Segun kadagiti grupo a Global AI Council Philippines, Blockchain Council of the Philippines, Cybersecurity Council of the Philippines, Data Center Association of the Philippines, Fintech Philippines Association, ken Go Digital Philippines, makatulong ti ‘Konektadong Pinoy’ bill nu mapapartak ti proseso ti panangipasdek kadagiti digital infrastructure a saanen a kasapulan pay ti legislative franchise.
Mainayon pay ti kiddaw da ket ti panangpababa ti presyo ti internet, panangpalawa ti serbisyo agingga kadagiti nasusulinek a lugar, panangpasayaat ti liderato iti radio spectrum, ken panangituding ti performance standards para ti proteksyon dagiti konsumer.
Impaganetget da a ti data localization ket makadakes iti negosyo, mangpangato kadagiti magastos, ken manglapped iti panangaramat ti teknolohiya kas iti cloud computing ken Artificial Intelligence. Maapektaran na pay daitoy dagiti babassit a negosyo ken mabalin a maawanan iti patas a kumpetisyon ti sektor ti information technology ken digital services.
Gapo iti dayta ket nagpanawagan iti Citizen Watch Philippines kenni Presidente Ferdinand Marcos Jr. nga i-veto lattan iti gakat. Kinuna da a posible a mangpataud daitoy iti problema kas iti panagserrek dagiti gangganaet a makaapektar ti digital infrastructure ti Pilipinas kasta met iti seryoso a pangta seguridad.
Idi Enero 2024 ket intandudo ni Presidente Marcos iti KPB kas maysa nga urgent bill, ken idi Hunyo 9 ket niratipkaran daitoy ti Kongreso.
