Saan a patien ti Presidential Anti-Organized Crime Commission nga adda aniaman a pangta iti biag ti naaresto ken naikkat a mayor ti Bamban, Tarlac, Alice Leal Guo wenno Guo Hua Ping.
Kinuna ni PAOCC Undersecretary Gilbert Cruz a dina mailadawan no asino ti aggangandat iti biag ni Guo no saanna nga ibaba ti nagan ti padana a sindikato wenno mangigdadaulo iti illegal a POGO a naraut iti ili ti Bamban, Tarlac.
Segun kenni PAOCC spokesperson Winston Casio, nagbiag ni Alice Guo ken ti pamiliana iti kinaulbod isu a saanna a patien ti aniaman a rummuar iti ngiwatda malaksid no adda iti ebidensia.
Kinuna daytoy ti opisyal ti PAOCC kalpasan a nagkiddaw ti dati a mayor ken ni DILG Secretary Benhur Abalos Jr. gapu ta adda kano iti death threat na.
Immuna metten a kinuna ti legal counsel ni Guo a ni Atty. Stephen David nga adda iti pangta ti biag ni Guo nga isut makagapo no apay a saan a nagsurrender daitoy kadagiti otoridad idi adda paylaeng isuna ditoy Pilipinas.
